Futbollisti brazilian Oscar thuhet se është detyruar t’i japë fund karrierës së tij pasi është shtruar në spital për shkak të problemeve me zemrën.
Oscar u shtrua në spital dje (e martë) pasi u ankua se nuk ndihej mirë, dhe lajmet e fundit thonë se për shkak të problemeve me zemrën ai do të duhet t’i japë fund karrierës dhe t’i përkushtohet rikuperimit.
Sipas Daily Mail, Oscar ra pa ndjenja gjatë stërvitjes, më saktësisht gjatë përdorimit të një biçiklete stërvitjeje gjatë përgatitjeve me ekipin brazilian Sao Paulo.
Braziliani ishte një yll i madh për Chelsean dhjetë vjet më parë, por në kulmin e karrierës së tij, kur ishte vetëm 25 vjeç, vendosi të largohej nga Blutë dhe të shkonte në Kinë.
Sigurisht, ai më pas u zhduk nga harta e futbollit dhe ra në harresë midis shumë tifozëve.
Sipas Global Esporte, Oscar tregoi shenja të një anomalie në zemër gjatë testeve para se të kthehej në fushë pas lëndimit. Mediat raportojnë se mjekët e Sao Paulos kanë vlerësuar se mesfushori është i aftë të rikthehet në fushë.
Oscar u rikthye në Sao Paulo në janar të këtij viti, pasi luajti për tetë vjet në Shanghai SIPG të Kinës, dhe më parë luajti edhe për Internacional përveç Chelseat.
Ai ishte dy herë kampion i Anglisë me Chelsean dhe një herë fitoi Ligën e Evropës me Blutë nga Londra. Ai bëri 48 paraqitje për ekipin kombëtar brazilian dhe shënoi 12 gola. /Kampionet/
