Mesfushori Dren Zeqiri thotë se do të jap më të mirën për fanellën e Kosovës, si dhe po synon trofe me FC Prishtinën këtë edicion.
21-vjeçari kaloi te FC Prishtina nga Ramiz Sadiku verën e kaluar megjithatë befasoi të gjithë duke u bërë i padiskutueshëm në formacionin e Arsim Thaqit.
Në një intervistë për Kampionetn, Zeqiri ka falënderuar skuadrën që e ka përkrahur prej kur e kompletoi transferimin, prandaj edhe u ambientua shpejtë te skuadra më e trofeshme kosovare.
“Sigurisht që kemi pasur një ecuri shumë të mirë në këtë fillim sezoni dhe shpresojmë të vazhdojmë në të njëjtën mënyrë. Sa i përket paraqitjeve të mia me fanellën e FC Prishtina, një rol të madh ka luajtur atmosfera fantastike brenda skuadrës dhe pritja e ngrohtë nga bashkëlojtarët, që më kanë ndihmuar të përshtatem shpejt dhe të jap maksimumin për ekipin”.
“Një falënderim të veçantë e kam për stafin teknik, për besimin që më ka dhënë. Me transferimin në Prishtinë, e dija që po vija në një klub me konkurrencë të madhe, por përmes angazhimit maksimal në çdo stërvitje dhe mundësive që i kam shfrytëzuar në ndeshje, kam arritur të siguroj vendin tim në formacion.
Dren Zeqiri
FC Prishtina është lider aktual në Superligën e Kosovës si dhe shihet favoriti kryesor për ta rikthyer titullin pas shumë viteve. Të njëjtin synim e ka edhe Zeqiri, i cili shtoi se objektivi kryesor janë trofetë.
“Sa i përket synimeve personale, do të vazhdoj të punoj fort për t’u përmirësuar çdo ditë dhe për të qenë sa më i dobishëm për skuadrën. FC Prishtina dihet që çdo sezon lufton për trofe, dhe ky mbetet edhe objektivi ynë kryesor. Duhet t’i marrim ndeshjet një nga një, pasi nuk ka kundërshtar të lehtë, por nëse vazhdojmë me këtë përkushtim, jam i bindur se në fund të sezonit do t’i arrijmë qëllimet tona.
Puna e madhe e lojtarit në fund edhe u shpërblye. Zeqiri i cili vëzhgohej edhe nga Alban Bushi i Shqipërisë U21, mori ftesën e parë nga Kombëtarja e Kosovës U21 për dy ndeshjet e muajit nëntor.
Dren Zeqiri
Ai deklaroi se gjithmonë e ka ëndërruar përfaqësimin e Kosovës dhe e vlerëson si nder dhe krenari që të jetë pjesë e “Dardanëve”.
“Ftesa nga Kosova U21 dhe selektori Afrim Toverlani ishte një moment shumë i veçantë për mua. Çdo futbollist ëndërron të përfaqësojë vendin e tij, prandaj për mua është një nder dhe krenari e madhe të jem pjesë e Dardanëve”.
Në fund, Zeqiri shtoi se do ta jep maksimumin për fanellën e Kosovës kurse synojnë rezultate pozitive ndaj Qipros dhe Finlandës.
Dren Zeqiri
“Nëse marr minuta në këto ndeshje, do të jap maksimumin për fanellën e Kosovës. Këto janë ndeshje shumë të rëndësishme dhe sfiduese, sidomos pasi i luajmë si mysafirë, por besoj se me punë, përkushtim dhe frymë ekipore do të arrijmë rezultate pozitive dhe do të tregojmë vlerat tona si ekip dhe si shtet”.
Kujtojmë, Kosova U21 do të jetë mysafir i Qipros U21 më 14 nëntor, kurse katër ditë më vonë do të përballet me Finlandën U21./Kampionet/
