Juventusi ndodhet tri pikë larg zonës së Ligës së Kampionëve, por për Luciano Spallettin puna nuk do të jetë vetëm për të përmirësuar rezultatet — trajneri italian duhet të zgjidhë disa probleme të thella që kanë ndikuar skuadrën në periudhën e fundit.
Spalletti mbërriti në Continassa të enjten në mëngjes, vetëm disa orë pas fitores 3-1 ndaj Udineses, për të firmosur kontratën e tij me “Zonjën e Vjetër”.
Marrëveshja është deri në fund të sezonit, me mundësi zgjatjeje në rast se arrihet kualifikimi në Ligën e Kampionëve.
Për ta bërë këtë, Spalletti duhet të adresojë disa çështje që kanë qenë problematike për Juventusin prej kohësh.
1/ Krijimi i rrezikut në sulm
Një nga problemet më të mëdha të Juventusit nën drejtimin e Igor Tudor ishte mungesa e qartësisë në fazën ofensive. Skuadra kishte kaluar katër ndeshje radhazi pa shënuar, duke barazuar një rekord negativ që daton nga viti 1991.
Statistikat e Sky Sport Italia treguan se Juventusi ishte i katërti në Serie A për topa të rikuperuar lart në fushë, por vetëm i 18-ti për raste të krijuara pas atyre rikuperimeve.
Pra, presingu funksiononte, por mungonte ideja e qartë për veprimet në zonën e rrezikut.
Spalletti duhet të vendosë hierarki të qartë në sulm, pa rotacione të panevojshme mes Vlahovic, David apo Openda. Vetëm me stabilitet dhe ide të qarta në finalizim, “Zonja e Vjetër” mund të rikthejë efikasitetin e saj klasik.
2/ Mungesa e lidershipit në fushë
Ky është një problem që nuk zgjidhet vetëm me taktikë. Edhe pse Tudor kishte deklaruar se Juventusi ka shumë liderë – duke përmendur Locatellin, Thuram, Perin, David dhe Vlahovic – fusha ka treguar të kundërtën.
Në momentet e vështira, skuadra shpesh ka mungesë reagimi dhe besimi. Spalletti është njohur për aftësinë e tij për të ndërtuar grupe me karakter të fortë, siç bëri me Napolin dhe Romën. Ai do të duhet të punojë jo vetëm në aspektin teknik, por edhe në atë psikologjik, për të krijuar një ekip që merr përgjegjësi në çdo situatë.
3/ Bashkëpunimi me drejtuesit
Një nga arsyet e largimit të Tudorit ishte mungesa e bashkëpunimit me strukturat e klubit. Spalletti duhet të punojë ngushtë me drejtuesit, veçanërisht me Damien Comolli, për të ndërtuar një skuadër në përputhje me filozofinë e tij të lojës.
Juventusi është ende në pritje të emërimit të një drejtori të ri sportiv, por cilido që të jetë, vendimet në afatin kalimtar duhet të përputhen me kërkesat e Spallettit.
Vetëm përmes një vizioni të përbashkët mes fushës dhe zyrës mund të rikthehet identiteti i munguar i klubit në vitet e fundit.
Luciano Spalletti njihet për disiplinë, strukturë dhe frymë pune të pandalshme. Nëse arrin të vendosë ekuilibër mes organizimit, mentalitetit fitues dhe efikasitetit në sulm, Juventusi mund të rikthehet në garën për kreun e Serie A dhe të rregullojë rezultatet në Champions, ku ka dy barazime dhe një humbje, pas tri ndeshjesh. /Kampionet/
