Nga një premtim i largët në Zagreb deri te golat në San Siro — kjo është historia e Petar Sucic, mesfushorit kroat që po fiton gjithnjë e më shumë zemrat e tifozëve zikaltër.
Vetëm disa muaj pas mbërritjes në Milano, 22-vjeçari është bërë pjesë e pandashme e formacionit të Cristian Chivu. Me 11 paraqitje mes Serie A dhe Ligën e Kampionëve, Sucic ka treguar personalitet, teknikë të lartë dhe aftësi për të kontrolluar ritmin e lojës.
Nga Zagrebi në Milano
Gjithçka nisi në fillim të shkurtit 2025, kur drejtuesit e Interit lëvizën shpejt për ta siguruar talentin kroat. Për 14 milionë euro, plus 2.5 milionë bonuse dhe një përqindje prej 10% në rast shitjeje të ardhshme, marrëveshja u mbyll në heshtje, por me shumë bindje nga ana e klubit.
Zikaltërit e shihnin Sucicin si një investim për të tashmen dhe të ardhmen, një profil që kombinon teknikën kroate me mentalitetin e punës që kërkon Interi.
Debutimi dhe shpërthimi
Sucic debutoi me qetësi, duke hyrë gradualisht në mekanizmin e ekipit. Por momenti i tij i madh erdhi në fitoren 3-0 ndaj Fiorentinës në San Siro, ku shënoi një gol të bukur dhe tregoi pse Chivu beson aq shumë tek ai.
“Jam i lumtur për të sepse është një mesfushor i plotë, me cilësi dhe me një motor të madh. Në rastin e golit tregoi qetësi dhe saktësi, jemi të lumtur për atë që po sjell në ekip”, deklaroi Chivu.
Një profil që i jep energji Interit
Me inteligjencë taktike, disiplinë dhe ndjenjë për hapësirën, Sucic është bërë një simbol i rinovimit që po ndodh në mesfushën e Interit. Klubi e sheh si një shtyllë afatgjatë për projektin e ri nën drejtimin e Chivut, ndërsa tifozët tashmë e përshëndesin si një “zbulim” të vërtetë.
Në më pak se një vit, Petar Sucic ka kaluar nga një premtim i talentuar në një realitet të prekshëm në Milano — dhe historia e tij me Interin sapo ka filluar. /Kampionet/
