Një teori konspirative e çuditshme është përhapur në rrjetet sociale dhe forumet në Brazil, sipas së cilës ylli i Real Madridit, Vinicius Junior, dyshohet se është zhdukur dhe është zëvendësuar nga një sozi i tij.
Përkrahësit e kësaj teorie pretendojnë se zëvendësimi i tij është bërë për të respektuar kontratat e sponsorizimit me vlerë miliona dollarë.
Përdoruesit në TikTok dhe forume të ndryshme kanë përmendur ndryshime të supozuara në pamjen e fytyrës së futbollistit, si dhe mungesën e disa tatuazheve të dallueshme në kofshë gjatë grumbullimit me Kombëtaren e Brazilit, duke i cilësuar ato si “prova kyçe”.
Teoria më pas shkoi edhe më tej, duke përfshirë pretendime për shërbime sekrete, elita botërore dhe madje edhe alienë.
“Një teori konspirative krejtësisht e çmendur pretendon se CIA dhe elitat vranë dhe zëvendësuan Viniciusin pas Kupës së Botës”, shkroi një përdorues me nofkën BlackBondPtv.
Disa teoricienë shkuan edhe një hap më tej, duke e lidhur këtë histori me një pushtim të supozuar nga reptilianët gjatë turneut.
Edhe profetesha braziliane Vo Bahiana i ka shtuar më tej këto spekulime.
“Duhet t’ju them se ëndërrova përsëri për alienët që sulmonin fushën e futbollit në Miami. I pashë qartë duke i marrë lojtarët me vete në anijen e parë që mbërriti”, deklaroi ajo në një video.
Megjithatë, këto pretendime nuk janë të mbështetura nga prova të besueshme. Në rrethin e futbollistit dhe te Real Madridi, këto teori dhe spekulime të përhapura në internet janë injoruar plotësisht./Kampionet/
