Vajza e Carlo Ancelottit zbulon përplasjen e vazhdueshme mes trajnerit të Brazilit dhe Gennaro Gattusos, e cila nisi pas shkarkimit të tij nga Napoli dhe emërimit të ish-lojtarit të tij në atë detyrë.
Sipas saj, Carlo Ancelotti, i njohur për qetësinë dhe diplomacinë e tij, u mërzit shumë me vendimin e Gattusos për ta zëvendësuar në pankinën e Napolit, diçka që e konsideroi si mungesë respekti.
Si lojtar, Gattuso kishte luajtur shumë ndeshje nën drejtimin e Ancelottit gjatë periudhës së tij te Milan, ku të dy fituan dy tituj të Ligës së Kampionëve dhe ndanë një marrëdhënie të fortë profesionale dhe miqësore.
Megjithatë, gjithçka ndryshoi në dhjetor të vitit 2019, kur Napoli vendosi të shkarkojë Ancelottin. Në atë kohë, presidenti Aurelio De Laurentiis po shqyrtonte zëvendësues të mundshëm dhe kishte nisur kontaktet paraprake me Gattuson.
Kur Ancelotti dëgjoi për këto zëra, ai e telefonoi ish-lojtarin e tij për ta pyetur personalisht, por Gattuso mohoi çdo kontakt me klubin. Vetëm pak ditë më vonë, pas fitores së Napolit ndaj Genk në Ligën e Kampionëve, Ancelotti u shkarkua dhe menjëherë pas tij Gattuso u emërua trajner i ri.
Gennaro Gattuso dhe Carlo Ancelotti te Milani
Më pas, Gattuso nuk e informoi Ancelottin për vendimin e tij për të marrë drejtimin e skuadrës. Situata arriti në atë pikë sa që, kur Ancelotti u kthye në qendrën stërvitore për të mbledhur sendet personale, ai shmangu kontaktin me sy me Gattuson.
Ngjarja ndodhi para gjashtë vitesh, por sipas vajzës së tij Katia Ancelotti, dyshja nuk ka folur dhe as takuar më që nga ajo kohë.
“Ata nuk kanë folur dhe as janë parë më. Babai ishte i mërzitur dhe nuk bën sikur s’ka ndodhur asgjë. Rino nuk e ka telefonuar më. Ndoshta do të shihen përsëri në Kupën e Botës, shpresojmë që Italia të kualifikohet. Një finale Brazil–Itali do të ishte e mrekullueshme. E fundit ishte në vitin 1994, atëherë babai ishte ndihmës i Sacchit. Ku ishte Gattuso atëherë?”.
“Do të doja ta shihja babin ashtu edhe në jetën e përditshme. Ai nuk e ekspozon veten, nuk do të mërzisë askënd. Një njeri që është shumë i qetë, ndoshta është përpara kohës së tij. Ai gjithmonë përpiqet të shmangë konfliktet”, ka thënë ajo./Kampionet/
